Ғабдулғазизовтар дәрігерлер әулеті жалпы еңбек өтілі 100 жылдан асатын, Павлодар облысының денсаулық сақтау саласының дамуына өлшеусіз үлес қосқан бірнеше буын медицина қызметкерлерінің басын біріктіреді. Олардың өмір жолы — адам жанына шипа дарытуды отбасылық парыз санаған ұрпақтар сабақтастығының жарқын үлгісі.
Әулеттің негізін қалаушы — белгілі хирург Мұхаметқайыр Саметайұлы Ғабдулғазизов. Ол өзінің дәрігерлік қызметін 1978 жылы Павлодар қаласының № 2 қалалық ауруханасында бастаған еді. Ширек ғасырдан астам уақытын өңір тұрғындарына хирургиялық көмек көрсетуге арнап, облыстағы қан тамырлары хирургиясының іргетасын қалауға зор үлес қосты. Өмірін өзгелерді құтқаруға арнаған білікті маман 49–50 жасқа қараған шағында кенеттен дүниеден озды.
Оның өмірлік жары, жоғары санатты дәрігер-рентгенолог Дәмет Сағындыққызы Ғабдулғазизова — өңір медицинасының нағыз ардагері. Семей мемлекеттік медицина институтын және рентгенология мамандығы бойынша интернатураны тәмамдаған соң, ол 1978 жылы Ғ. Сұлтанов атындағы Павлодар облыстық ауруханасында дәрігер-рентгенолог болып алғашқы еңбек жолын бастады. Жылдар бойы № 2 қалалық аурухананың рентгенология бөлімшесін басқарып, Облыстық перинаталдық орталықта да белсенді қызмет етті. Сондай-ақ 2000 жылдан бастап өзінің алғашқы қара шаңырағы — Ғ. Сұлтанов атындағы облыстық ауруханаға қайта оралып, бөлімше меңгерушісі лауазымында зейнетке шыққанға дейін аянбай еңбек етті.
Өз ісінің хас шебері ретінде Дәмет Сағындыққызы өңірде сәулелік диагностиканың ең заманауи әдістерін енгізіп, жоғары білікті зерттеулер жүргізді. Ол облыстағы жалғыз перинаталдық рентген-диагностика маманы болды, сот-медициналық сараптамалар мен әскери-дәрігерлік комиссия жұмыстарына тұрақты қатысып, облыстық денсаулық сақтау басқармасының штаттан тыс бас рентгенологы қызметін атқарды. 48 жылдық еңбек өтілі бар аяулы дәрігердің еңбегі мемлекет тарапынан еленіп, «Денсаулық сақтау ісінің үздігі» төсбелгісімен (2015) және «Еңбек ардагері» медалімен (2019) марапатталды.
Әке жолын қуып, ана соқпағын жалғаған қызы Шайзат Мұхаметқайырқызы Ғабдулғазизова — жоғары санатты дәрігер-нарколог және психотерапевт. 24 жылдық еңбек өтілі бар ол бүгінде Республикалық психикалық денсаулық ғылыми-практикалық орталығының психотерапия және оңалту бөлімшесін басқарады. Шайзат Мұхаметқайырқызы тәжірибелік емдеу жұмысын ұйымдастырушылық және ғылыми-практикалық қызметпен шебер ұштастырып келеді.
Әулеттің күйеу баласы Қасымхан Абылайханұлы Тілеубаев — медицина ғылымдарының кандидаты, жоғары санатты дәрігер-офтальмолог. Ол 1999 жылдан бері Ғ. Сұлтанов атындағы Павлодар облыстық ауруханасында жұмыс істеп, 2010 жылдан бастап офтальмология бөлімшесін басқарып келеді. Офтальмологиялық патологияларды диагностикалау мен емдеудің күрделі хирургиялық әдістерін меңгерген маманның жасаған операцияларының 96 пайызы — аз инвазивті тәсілмен жасалады. Ол облыста алғаш рет көз бұршағының шығуымен асқынған катаракта кезінде күрделі оталар жасап, дренаж имплантациялау арқылы гипотензивті операцияларды тәжірибеге енгізді. Павлодар облысының штаттан тыс бас офтальмологы ретінде ол облыстық байқауда «Үздік дәрігер» атанды (2018), «Денсаулық сақтау ісінің үздігі» атанды (2020), ал 2022 жылы кәсіби шеберліктің шыңы саналатын «Алтын скальпель» номинациясын иеленді.
Шаңырақтың ұлы Қуат Мұхаметқайырұлы Ғабдулғазизов та әулеттің хирургиялық бағытын таңдап, травматолог-ортопед атанды. Ол 2014 жылы Семей мемлекеттік медицина университетін тәмамдап, 2015 жылдың шілдесінен бастап Ғ. Сұлтанов атындағы облыстық ауруханада еңбек етіп келеді. 11 жылдық еңбек өтілі бар жас маман өзінің адал еңбегі, кәсібилігі мен жетістіктері үшін аурухана әкімшілігі тарапынан бірнеше рет марапатталды.
Әулеттің келіні Сәуле Оралқанқызы Ғабдулғазизова 2016 жылдың қыркүйегінен бастап Ғ. Сұлтанов атындағы облыстық ауруханада дәрігер-офтальмолог болып қызмет етеді. Офтальмология бойынша екінші біліктілік санаты бар жас маман 2021 жылы аурухананың Құрмет грамотасымен марапатталған. Бүгінде ол отбасының аяулы анасы ретінде бала күтіміне байланысты демалыста.
Бұл әулеттің медицинадағы шежірелі жолы мұнымен тоқтамайды. Бүгінде шаңырақтың үшінші буын өкілі — немересі Ұлан Астана медицина университетінің 5-курсында білім алып, ата-анасы мен ата-әжесінің жолын лайықты жалғастыруға дайындалып жүр.
Ғабдулғазизовтар әулеті рентгенология, хирургия, травматология-ортопедия, офтальмология, наркология және психотерапия секілді медицинаның түрлі күрделі салаларын біріктіріп отыр. Ғасырдан асқан жалпы кәсіби еңбек өтілі, ұрпақтар сабақтастығы мен дәрігерлік борышқа деген адалдық бұл отбасын кәсібиліктің және адам денсаулығына қызмет етудің шынайы әрі жарқын үлгісіне айналдырды.