«QAZAQMETALL KASIPODAGY» Қазақстандық салалық тау-кен металлургия кәсіподағы» ҚБ бастамасымен Павлодарда «Әйелдер бірлігі — өзгерістер күші» атты тау-кен металлургия саласындағы еңбекші әйелдердің халықаралық форумы өтті.
Форумға халықаралық еңбекші әйелдер делегациясы — Türk Metal кәсіподағының (Түркия Республикасы) өкілдері, мемлекеттік органдардың, әлеуметтік әріптестердің, кәсіподақ ұйымдарының өкілдері, сондай-ақ Павлодар облысының тау-кен металлургия саласындағы кәсіпорындарының әйел жұмысшылары қатысты.
Форумның мақсаты — лайықты еңбек, әлеуметтік қорғау, кәсіби даму, әйелдердің мүмкіндіктерін кеңейту және олардың қазіргі еңбек ұжымдарындағы рөлі мәселелері бойынша кәсіподақтар, жұмыс берушілер, мемлекеттік органдар және әйел жұмысшылар арасында ашық диалог пен тәжірибе алмасуға арналған халықаралық алаң құру.
Халықаралық форумды «QAZAQMETALL KASIPODAGY» Қазақстандық салалық тау-кен металлургия кәсіподағы» ҚБ төрағасының орынбасары, Павлодар облысының Кәсіподақтар аумақтық бірлестігінің Гендерлік комиссиясының төрайымы Раушан Даумова ашты.
«Біздің форум — бұл тек кездесіп, тәжірибе алмасу мүмкіндігі ғана емес. Сондай-ақ қазіргі еңбек ұжымындағы әйелдің рөлі қалай өзгеріп жатқаны, әйелдер алдында қандай мүмкіндіктер ашылып отырғаны және бізге әлі де қандай міндеттерді бірлесіп шешу қажет екені туралы ашық айтуға арналған алаң. Әйелдер тәжірибесін, білімін және бастамасын біріктірген кезде, олар оң өзгерістердің нақты күшіне айналады», - деп атап өтті Раушан Даумова.
Павлодар облысы әкімінің орынбасары Айгүл Маликова форум қатысушыларын жылы қарсы алып, Қазақстан мен Түркияның тау-кен металлургия саласындағы кәсіподақтары арасында еңбек және әйелдердің еңбек құқықтарын қорғау саласында халықаралық тәжірибе алмасудың тарихи маңыздылығын атап өтті.
Достас Türk Metal кәсіподағының (Түркия Республикасы) Әйел жұмысшылар бюросының үйлестірушісі Büşra Dağ Kıbnışma Түркия кәсіпорындарындағы еңбекші әйелдердің құқықтарын қорғау жөніндегі кәсіподақ жұмысының тәжірибесі туралы айтып берді.
Өндірісте әйелдердің еңбегін қорғау және қауіпсіздігін қамтамасыз ету бойынша қабылданып жатқан шаралар туралы «Қазақстан алюминийі» АҚ еңбек қауіпсіздігі және өнеркәсіптік қауіпсіздік жөніндегі директоры Николай Юферов баяндады. Ол еңбек қауіпсіздігі талаптарын мүлтіксіз сақтаудың және қызметкерлердің денсаулығын сақтауға бағытталған қауіпсіз жағдайлар жасаудың маңыздылығын атап өтті.
Форум барысында «Қорғаудан көшбасшылыққа: еңбек әлеміндегі әйелдің жаңа рөлі» тақырыбына ерекше назар аударылды.
Павлодар облысының «Павлодар облысының кәсіподақ орталығы» Аумақтық кәсіподақтар бірлестігінің төрайымы Динара Айтжанова әйелге қолайлы жұмыс орнын құрудың маңыздылығын атап өтті, мұнда лайықты еңбек жағдайлары кәсіби қызмет пен отбасылық міндеттерді қатар атқаруға мүмкіндік береді.
«Заңда көзделген ең төменгі деңгейден тыс қосымша кепілдіктер белгілеуге мүмкіндік беретін ұжымдық шарт ерекше рөл атқарады. Павлодар облысының кәсіпорындарында бұл - қосымша ақылы күндер, отбасыларға материалдық көмек, көпбалалы ата-аналарға және мүгедектігі бар балаларды тәрбиелеп отырған отбасыларға қолдау көрсету. Егер кәсіподақ қызметкерлердің нақты қажеттіліктерін білсе, ал жұмыс беруші тыңдауға және келіссөз жүргізуге дайын болса, ұжымдық шарт еңбек өмірінің сапасын жақсартудың нақты құралына айналады», — деп атап өтті Динара Айтжанова.
Форум бағдарламасы «Қазхром» ТҰК» АҚ Ақсу ферроқорытпа зауытының металлургиялық өндірісіндегі кран машинисі Зарина Абикенованың баяндамасымен аяқталды.
«Кран машинисі мамандығы — өндірістегі ең жауапты мамандықтардың бірі. Менің жұмыс орным 25 метр биіктікте орналасқан және менің жұмысыма өндірістік тапсырманың орындалуы ғана емес, цех қызметкерлерінің қауіпсіздігі де байланысты», — деп атап өтті Зарина Абикенова.
Ол өзінің кәсіби жолы, цех комитетінің төрағасы ретіндегі қоғамдық қызметі, Павлодар облысының Кәсіподақ орталығының Гендерлік комиссиясындағы жұмысы, сондай-ақ кәсіпорынның ұжымдық шартында көзделген әйелдерге арналған жеңілдіктер мен кепілдіктер туралы айтып берді.
Халықаралық форум мемлекет, жұмыс берушілер, кәсіподақтар және жұмысшылардың өздері арасындағы ашық диалог алаңына айналды. Талқыланған идеялар мен ұсыныстар одан әрі ынтымақтастыққа, жаңа бастамалар мен нақты іс-қимылдарға негіз болады.
Кездесу қарапайым, бірақ маңызды ойды тағы бір мәрте растады. Әйелдер тәжірибесін, білімін және бастамасын біріктірген кезде, олардың өмірі ғана емес — еңбек ұжымдары, кәсіпорындар және жалпы қоғам да өзгереді.